“Mae gan iaith, unrhyw iaith, nodwedd ddeuol: mae’n ddull o gyfathrebu ac yn gludydd diwylliant”
- Ngũgĩ wa Thiongʾo
Ynglŷn â’r prosiect
Mae Panel Cynghori Is-Sahara yn gwahodd artistiaid i’n helpu ni i archwilio cysylltiadau diwylliannol Affro-Gymreig ac archwilio’r ffordd y gall syniadau, creadigrwydd a dysgu lifo rhwng gwledydd Cymru ac Affrica heb hierarchaeth ffug.
Ein gweledigaeth yw datblygu cyfnewidfa gysylltiedig yn fyd-eang o gelf a diwylliant a lleisiau pobl greadigol Affricanaidd a Chymreig.
Mae gennym ddiddordeb yn adeiladu pontydd uniongyrchol rhwng pobl greadigol, diwylliannau ac ieithoedd. Byddwn yn archwilio hierarchaethau iaith ac yn archwilio potensial offer gweledol, barddonol a chreadigol, dawns ac ystum i gyfleu naratif, emosiynau, atgofion a diwylliant.
Cyfle
Rydym yn chwilio am artistiaid, pobl greadigol, perfformwyr neu weithredwyr (unigol neu ar y cyd) sydd eisiau datblygu rhwydweithiau newydd, creu cysylltiadau, cydweithredu’n rhyngwladol a chreu llwyfannau newydd i gysylltu a rhannu.
Byddwn yn cydweithio i ddatblygu gweithgareddau a chelf ar-lein yn ogystal â rhai bywyd go iawn. Bydd yr ymgeiswyr llwyddiannus yn derbyn mentora creadigol a strategol i’w galluogi i archwilio cydweithrediadau newydd, ffyrdd newydd o weithio a mynegiant ac i gydweithredu i greu gwaith newydd ac arbrofol. Yn bwysig iawn, byddant hefyd yn dysgu oddi wrth ei gilydd.
Rydym yn chwilio am artistiaid sydd eisiau bod yn rhan o daith ac esblygu gyda’i gilydd, yn hytrach nag ar gyfer syniadau a gwaith cyflawn.
Gwahoddir artistiaid i weithio mewn cyfrwng o’u dewis nhw gan gofio y bydd y prosiect yn cael ei arddangos yng Nghymru a gwledydd Affricanaidd, yn mynd ar daith ac yn cael ei ledaenu ar-lein ac mewn bywyd go iawn. Mae gennym ddiddordeb arbennig mewn celf sydd yn gallu croesi ffiniau, sydd yn ddigidol neu’n gallu bodoli ar sawl fformat.
Cymhwysedd
Gall unrhyw un o unrhyw gefndir wneud cais. Rydym yn annog ceisiadau gan artistiaid yn ystod unrhyw gyfnod o’u gyrfa.
Yn unol â nodau’r prosiect, rydym yn annog ceisiadau gan bobl o dras Affricanaidd (yn cynnwys cymunedau alltud, fel pobl Affro-Garibïaidd a phawb â chysylltiadau personol neu ddiwylliannol ag Affrica neu’n preswylio mewn Gwlad Affricanaidd). Rydym hefyd yn awyddus i glywed gan siaradwyr Cymraeg, ac artistiaid sydd yn ystyried eu hunain yn Gymry neu’n byw yng Nghymru.
Cyllideb
Ffi gomisiwn: £1500
Ffi untro yw hon
Gellir trafod cyllidebau bach ychwanegol sydd yn ofynnol ar gyfer cynhyrchu, deunyddiau, a sesiynau gyda’r bobl greadigol fel y bo angen yn ystod y prosiect.
Proses ddethol
Bydd rhestr fer o’r cynigion yn cael ei llunio gan Watch-Africa, Jukebox, Panel Cynghori Is-Sahara a’r awdur alltudiaeth blaenllaw Mola Eric Ngalle. Rydym yn gonsortiwm o bobl greadigol a sefydliadau Du wedi ein lleoli yng Nghymru a byddwn yn chwilio am gynigion sydd yn archwilio Cymru, Affrica a’i diwylliannau amrywiol a’i halltudion. Rydym yn chwilio am geisiadau sydd yn cyd-fynd â briff y prosiect, syniadau a lleisiau gwreiddiol a’r potensial ar gyfer cydweithredu rhwng yr artistiaid dethol. Bydd artistiaid ar y rhestr fer yn cael cyfweliad cyn bod penderfyniad terfynol yn cael ei wneud.
Llinell Amser Arfaethedig
Oherwydd natur Covid 19, gall llinellau amser newid ond ein gobaith yw y bydd y gwaith ar gael i’w arddangos gydag amserlen fynegol fel a ganlyn:
Awst 2021: cyfweliadau rhestr fer a dewis artist buddugol
Medi 2021: dechrau gweithdai a chyfarfodydd cohort artistiaid
Hydref 2022: cydweithrediadau creadigol
2023: arddangosiadau creadigol yng Nghymru ac Affrica
Sut i wneud cais
Anfonwch lythyr byr sydd yn amlinellu eich syniadau a’ch diddordebau, yn ogystal â chyflwyniad byr yn eich disgrifio chi a’ch gwaith creadigol i ophelia@ssap.org.uk
Mae croeso i chi gynnwys dolen i’ch portffolio neu ddelweddau ac enghreifftiau o’ch gwaith.
Os oes well gennych anfon fideo neu recordiad sain, caiff hwn ei dderbyn hefyd yn lle cais ysgrifenedig.
Y dyddiad cau ar gyfer ceisiadau yw canol nos GMT ar ddydd Sul 01/08/21
Gwybodaeth ychwanegol
Rydym eisiau i’r broses ymgeisio fod mor deg â phosibl ac rydym yn addo gwneud addasiadau rhesymol i’r broses hon er mwyn cyflawni hyn. Cysylltwch os oes unrhyw addasiadau y gallem eu gwneud neu gymorth ychwanegol y gallem ei gynnig er mwyn eich helpu chi i wneud cais. Byddwn yn meddwl am opsiynau amgen addas gyda’n gilydd.
Mae’r prosiect hwn yn gydweithrediad rhwng Watch Africa Cymru, SSAP a Jukebox collective wedi ei ariannu gan Gyngor Celfyddydau Cymru – asante/diolch am helpu i adeiladu pontydd.
